Эрхэм уншигч таньтай мэндчилж байна. Хамгийн эхний постоор блогын нэр болон түүн дор бичигдэх бичвэрүүдийн утга санааг товчхон илэрхийлсэн товч удиртгал оруулахаар шийдсэн минь энэ билээ...
Dichotomia нь грек гаралтай бөгөөд монголчилбол хоёр хэсэгт хуваах гэсэн утгатай. Төрөл ойлголтын багтаамжаас өөрийн сонирхож буй судлагдахууныг ялган үзэж, түүнийхээ зөрчилт ойлголтыг үүсгэх замаар хоёр хуваах үйлдлийг дихотоми гэдэг. Нэг ёсондоо хорвоо дээрх бүх зүйлд агуулагддаг инг янг чанар шиг, сайн муу, сайхан муухай, орших эс орших хэмээн хуваадаг хүний тархины үйлийг нэрлэсэн нэр томьёо. Тиймдээ ч энэхүү блогоор дамжуулан админ миний бие өөрийн тархины үйл ажиллагааны үр дүн болох зөрчилдөөнөөс эхлүүлээд дээд ухамсар, жинхэнэ хүч чадал хүртэл хамаарагдах сэдэв агуулгыг хөндөх юм. Тайван тогтвортой үед дотоод дуу хоолойн хэлсэн үгс, магад эго мөн чанар хоёрын тулаан, эсхүл хэн нэгэн хүний үнэт дамжуулалт, цаашлаад шинэ үнэрийг нь авсан номын үнэт мэдлэгийн талаар ч байж болох юм. Эдгээрийг нэгтгэж зангидах гол агуулга нь хүний дээд бие, хязгааргүй дотоод хүч чадлын талаарх гэдгийг ойлгох хэрэгтэй. Бусад блогоос ялгарах зүйл нь гагцхүү энэ учир хэн бүхний сэтгэл оюунд таарахгүй байх нь олонтоо гэдгийг таамагласан болно. Ийнхүү цаашид орох бичвэрүүдтэй хамт байж, санал бодлоо харамгүй хуваалцахыг хүсье.
Comments
Post a Comment